Известување за упис на првачиња

И З В Е С Т У В А Њ Е

за родител/старател заинтересиран за упис на детето во прво одделение во учебната 2023/24 година во ООУ „Јохан Хајнрих Песталоци“ – Скопје

Децата во прво одделение во училиште се запишуваат во месец мај за следната учебна година. Во прво одделение во основното училиште родителот односно старателот е должен да го запише детето кое до крајот на календарската година ќе наполни шест години. По исклучок детето може да се запише во прво одделение доколку наполни шест години до 31 јануари наредната година, по претходно барање од родителот, односно старателот и добиено мислење од педагогот или психологот во училиштето.

Родителот, односно старателот има право да го запише детето во основното училиште во реонот во кој живее или каде што постојано престојува. Основното училиште е должно да ги опфати учениците од својот реон. Родителот, односно старателот може да го запише детето во друго основно училиште во истиот или друг реон ако за тоа има согласност од училиштето во кое се запишува и од училиштето од реонот во кој живее или каде што постојано престојува. Основното училиште може да запише ученици од друг реон или од друга општина само доколку има слободни места за запишување или доколку ученикот од другиот реон или општина нема можност за следење на наставата на својот мајчин јазик во својот реон односно општина.

Пријавата за упис на првачиња ја пополнувате електронски на веб страна www.ooupestaloci.edu.mk од 18. IV 2023 год. или во просторииите на училиштето секој работен ден од 2. V 2023 година во период од 9:00 – 14:00 часот.

По извршеното барање за упис на детето во прво одделение, ќе добиете информација за датум и време за упис на Вашето дете. На закажаниот ден родителот ќе може да ги заврши сите активности поврзани со уписот на детето во прво одделение.

Потребни документи за запишување:

· Потврда за примени задолжителни вакцини, издадена од надлежна установа

· Потврда за стоматолошки преглед, издадена од надлежна установа (Потврдата може да ја добиете во училишната стоматолошка амбуланта, закажување на тел. 070/654-944)

· Потврда за офталмолошки преглед, издадена од надлежна установа (Општина Центар има склучено Меморандум за соработка со ЈЗУ - Здравствен дом – Скопје, Поликлиника Букурешт каде може да се направат офталмолошките прегледи)

· Лична карта од родител - на увид

Доколку родителот дава информација дека детето е со атипичен развој, треба да се достави и функционална проценkа од стручната комисија за проценка на деца и младинци за дополнителна образовна, социјална и здравствена поддршка според МКФ.

Сите дополнителни информации можете да ги добиете на меил адресата prvacinjapestaloci@gmail.com секој работен ден од 9 до 12 часот.

Во наредните денови редовно на веб страната на Училиштето, www.ooupestaloci.edu.mk ќе известуваме за сите нови информации кои ќе ги добиваме од надлежните институции.

Скопје, 10. IV. 2023

Директор

Катерина Атанасова